話說近日美國總統拜登就高調喺亞美尼亞大屠殺紀念日當日宣佈1915年鄂圖曼土耳其帝國針對亞美尼亞人嘅大屠殺係屬於種族滅絕行為，呢個消息一傳出，土耳其總統艾爾段雖然承認有殘暴嘅殺戮發生，但佢就認為呢件事係受到第三方政治化，更加召見美國駐土大使「以最強烈措辭反對並譴責」。咁到底亞美尼亞大屠殺係咩事呢？阿史今次就同大家介紹下啦！

要提起呢件事就要由第一次世界大戰果陣講起，作為同盟國一方嘅土耳其喺一戰薩瑞卡密斯戰役慘敗咗畀俄國之後，當時奧斯曼土耳其人就認為呢次嘅失敗係因為住喺薩瑞卡密斯信奉基督教嘅亞美尼亞人主動協助俄國人而令到佢哋慘敗。於是當時戰爭部長恩維爾下令所有軍方單位將部隊內嘅亞美尼亞人移走，改編佢哋入無武裝勞動營，於是慘烈嘅事件就開始發生喇！

奧斯曼土耳其人仲開始大規模將亞美尼亞人驅逐到敘利亞沙漠同埋其他地區，成千上萬名亞美尼亞人死於屠、饑餓或其他疾病；據亞美尼亞估計，至少有150萬人死亡，而土耳其方面就宣稱死亡人數達到30萬。但無論點都好，呢件事喺歐洲議會、甚至二十幾個發達國家都認為係一件「違反人性的罪行」。

原圖嚟自網絡